सूरदास

सूरसागर

बलभद्र ब्रज यात्रा

श्याम राम के गुन नित गाऊँ | स्याम राम ही सौं चित लाऊँ ||
एक बार हरि निज पुर छाए | हलधर जी वृंदाबन गए ||

रथ देखत लोगनि सुख पाए | जान्यौ स्याम राम दोउ आए |
नंद जसोमति जब सुधि पाई | देह गेह की सुरति भुलाई ||
आगैं ह्वै लैबै कौ धाए | हलधर दौरि चरन लपटाए ||
बल कौ हित करि करें लगाए | दै असीस बोले या भाए ||
तुम तौ बली करी बलराम | कहाँ रहे मन मोहन स्याम ||
देखौ कान्हर की निठुराई | कबहूँ पाती हू न पठाई ||
आपु जाइ ह्वाँ राजा भए | हमकौं बिछुरि बहुत दुख दए ||
कहौ कबहुँ हमरी सुधि करत | हम तौ उन बिनु कहु दुख भरत ||
कहा करैं ह्वाँ कोउ न जात | उन बिनु पल पल जुग सम जात ||
इहिं अंतर आए सब ग्वार | भेंटे सबनि जथा ब्यौहार ||
नमस्कार काहूँ कौ कियौ | काहू कौं अंकम भरि लियौ ||
पुनि गौपी जुरि मिलि सब आईं | तिन हित साथ असीस सुनाई ||
हरि सुधि करि बुधि बिसराई | तिनकौ प्रेम कह्यौ नहिं जाई ||
कोउ कहै हरि ब्याहीं बहु नार | तिनकौ बड्यौ बहुत परिवार ||
उनकौं यह हम देंति असीस | सुख सौं जीवैं कोटि बरीस ||
कौउ कहै हरि नाहीं हम चीन्ही | बिनु चीन्हैं उनकौं मन दीन्हौ ||
निसि दिन रोवत हमैं बिछोइ | कहौ करैं अब कहा उपाइ ||
कोउ कहै इहाँ चरावत गाइ | राजा भए द्वारिका जाइ ||
काहे कौं वै आवैं इहाँ | भोग बिलास करत नित उहाँ ||
कोऊ कहै हरि रिपु छै किए | अरु मित्रनि की बहु सुख दिए ||
बिरह हमारौ कहँ रहि गयौ | जिन हमकौ अति हीं दुख दयौ ||
कोउ कहै जे हरि की रानी | कौन भाँति हरि कौं पतियानी ||
कोऊ चतुर नारि जो होइ | करै नहिं पतिआरौ सोइ ||
कोउ कहे हम तुम कत पतियाईं | उनकें हित कुल लाज गवाईं ||
हरि कछु ऐसौ टोना जानत | सबकौं मन अपनैं बस आनत ||
कोउ कहै हरि हम बिसराईं | कहाँ कहैं कछु कह्यौ न जाई ||
हरिकौं सुमिरि नयन जल ढारैं | नैंकु नहीं मन धीरज धारैं ||
यह सुनि हलधर धीरज धारि | कह्यौ आइहैं हरि निरधारि ||
जब बल यह संदेस सुनायौ | तब कछु इक मन धीरज आयौ ||
बल तहँ बहुरि रहे द्वै मास | ब्रज बासिनि सौं करत बिलास ||
सब सौं मिलि पुनि निजपुर आए | सूरदास हरि के गुन गाए ||8||