सूरदास

सूरसागर

मथुरा प्रवेश तथा कंस बध

          धनुषसाला चले नँदलाला |
सखा लिए संग प्रभु रंग नाना करत, देव नर कोउ न लखि सकत ख्याला ||
नृपति के रजक सौं भेंट मग मैं भई, कह्यौ दै बसन हम पहिरि जाहीं |
बसन ये नृपति के जासु प्रजा तुम, ये बचन कहत मन डरत नाहीं ||
एक ही मुष्टिका प्रान ताके गए, लए सब बसन कछु सखनि दीन्हे |
आइ दरजी गयौ बोलि ताकौं लयौ, सुभग अँग साजि उन विनय कीन्हे ||
पुनि सुदामा कह्यौ गेह मम अति निकट, कृपा करि तहाँ हरि चरन धारे |  
धोइ पद-कमल पुनि हार आगैं धरे, भक्ति दै, तासु सब काज सारे ||
लिए चंदन बहुरि आनि कुबिजा मिली, स्याम अँग लेप कीन्हौ बनाई ||
रीझि तिहिं रूप दियौ, अंग सुधौ कियौ, बचन सुभ भाषि निज गृह पठाई |
पुनि गए तहाँ जहँ धनुष, बोले सुभट हौंस, जनि मन करौ बन-बिहारी |
सूर प्रभु छुवत धनु टूटि धरनी पर्‌यौ, सोर सुनि कंस भयौ भ्रमित भारी ||21||